يعني ايه انترنت الاشياء IOT ؟ هل هو مرتبط بدمار البشرية ؟ كل ماتريد معرفته

يعني ايه انترنت الاشياء Internet Of Things ..؟

عمرك فكرت في يوم من الايام تكتب في جوجل انا عامل ايه ؟ او مثلا تقوله هي فين المفاتيح بتاعتي أو ممكن تعملي قهوة ؟ او اي حاجة تانية تقدر تطلبها وتكون مرتبطة بنظام معين , هو دا موضوع انهاردة .

كل الحاجات دي تقدر تعملها بنظام اسمه انترنت الاشياء أو Internet of things تعالو بقى نتعرف على معنى المصطلح دا وتاريخه وكل حاجة عنه !

مشاهدة الفيديو بدقة 4K :

مفيش حد فينا ميعرفش الانترنت وغالبا مفيش حد مبيستخدمش الانترنت في حياته بل ان الانترنت اصبح شيئ اساسي في حياة بعض الناس ومنغيره ميقدرش يعيش !

بس احنا لما بنقول انترنت الاشياء ف احنا بنجيب سيرة الاشياء.

الاشياء هنا مقصود بها اي شيئ وكل شيئ (البضاعة , الموارد , الالات , الماكينات , المباني , الحيوانات , النباتات , المركبات سواء كانت سيارات / طيارات ..الخ)

في سنة 1999 بدأت فكرة اننا نربط شوية اجهزة ببعض عن طريق network  او شبكة معينة ونقدر نعرف كل المعلومات عن الاجهزة او الاشياء دي وكان الشخص اللي بيفكر كدا هو العالم البريطاني كيفن اشتون  .

وبما أن انترنت الاشياء دا ملهوش تعريف محدد او معين نقدر نقول انه : هو نظام الاجهزة او الأشياء المرتبطة والمتصلة ببعضها وبتبقى متعرفة بID معين وعندها القدرة انها تجمع معلومات وتنقلها عن طريقة شبكة الانترنت بدون تدخل الانسان .

طيب ايه فكرة عمل نظام انترنت الاشياء ؟

هنوضحها بمثال صغير مقتبس من منظمة TED , لو عندنا كرسي فالبيت وعايز اعرف هو في حد قاعد عالكرسي ولا لأ ومين اللي قاعد عليه وانا برة البيت , الحوار دا هيمر بشوية خطوات عشان يتم بشكل صحيح.

الخطوات :

1-اول حاجة هي الشيئ (اللي هو في المثال الكرسي)
2-ومحتاجين نديلة ID أو هوية معينة عشان نقدر نوصل للكرسي دا بعينه مش اي كرسي تاني.
3-وكمان محتاجين ندي للكرسي القدرة على التواصل بطريقة لاسلكية.
4-وفي الاخر محتاجين نديلة القدرة على الاحساس عشان نعرف سواء كان في حاجة عليه او في حد قاعد عليه ودا طبعا بيتم عن طريقة الحساسات او الـsensors (زي حساس الضغط pressure sensor  كدا)

وبكدا بموبايلي وانا في اي مكان في العالم اقدر اعرف معلومات عن الكرسي .
واللي انا قولته دا مثال صغير جدا , وممكن نطبق نظام انترنت الاشياء على وسائل النقل وفي الزراعة وفي الصناعة , وفي حدائق الحيوانات وفي الحظائر , وفي الطاقة ,وفي الطب , والهندسة المعمارية واكبر مثال نقدر نقوله هو انه بيتم استخدامه في الفضاء .

تعالوا بقى نتعرف على المميزات والعيوب .

من مميزات انترنت الاشياء :

انه بيوفر وقت كبير جدا : عن طريق النتائج الدقيقة اللي بيقدمهالنا بكفاءة عالية في اقل وقت

بيوفر فلوس : عن طريق انه بينبهك عن اي اعطال او اخطاء او مشاكل موجودة عشان تتجنب تلف الاجهزة او اي خسارة

وطبعا بيسهل علينا الحياة والتعامل مع الاشياء .

بالنسبة لعيوبه فهي كتير بردو , ولكن اكبر مشكلة في انترنت الاشياء هي تقريبا انعدام الخصوصية او قلتها بشكل كبير !

يعني مثلا لو التلاجة بتاعتك متصلة بالمحل اللي جمبكم واللبن خلص من عندك , فهي هتطلب منه الحاجات الناقصة , وبالتالي المحل هيعرف عني كل حاجة , انا باكل ايه وبشرب ايه وكل حاجة L

ومشكلة كمان ان بسبب ارتباط كل الاجهزة ببعض ف دا معناه ان اختراق جهاز واحد بؤدي الى اختراق بيتك كله L

انا مش قصدي اخوفك من انترنت الاشياء ولا بحاول اظهرلك انه احسن حاجة , بس كثرة ارتباط التكنولوجيا بينا هتأثر على حياتنا وبالتالي التكنولوجيا هي اللي هتسيطر علينا مش العكس !

في الأول انا جيبت سيرة جوجل , بس المقصود منها مش جوجل كمحرك بحث طبعا لأ ولكن المقصود منها اي خدمة بتقدمها شركة جوجل (او اي شركة تانية) مرتبطة بانترنت الاشياء .

مصادر :

https://goo.gl/6iPgBF

https://goo.gl/Emy8cz

https://goo.gl/JXKX6T

https://goo.gl/YpVStr