يعني ايه بروكسي proxy ..؟ انواعه واستخداماته وكل شيئ عنه

يعني ايه بروكسي proxy ..؟

كلمة بروكسي لو جينا نشوفها في المعجم اللغوي أو في القاموس هنلاقي معناها الوكيل والوكيل دا اللي هو الشخص بيقوم بخدمة معينة بدلا من شخص تاني , يعني انا لو وكلت شخص تاني عني او عملت توكيل لحد يقدر يقوم بأي حاجة بدالي باسمي يعني ممكن يبيع اي حاجة او يشتري اي حاجة بأسمي لأنه وكيل عني .

اما بقى في عالم الانترنت الproxy بيبقى عبارة عن سيرفر والسيرفر دا بيلعب دور الجسر بين الكمبيوتر والأنترنت.

عشان اوضح الفكرة , انت من غير proxy بتتصل بالأنترنت بشكل مباشر ,يعني لو عايز تفتح الفيسبوك او الواتساب او اي موقع او برنامج بيتصل بالأنترنت فالبرنامج دا بيتصل بالأنترنت بشكل مباشر عن طريق الراوتر .

طيب لو انت عامل proxy  , لأ هتختلف بقى , بدل ما تفتح الأنترنت مباشر هتعدي سيرفر الproxy والسيرفر دا هيستلم بياناتك ويوصلها للموقع اللي انت عايز تدخل عليه لكن بip مختلف , طب والرد اللي هييجي من الموقع هيروح فين ؟ اكيد مش هيرجعلك لأ , هيعدي على سيرفر الproxy وبعدها يجيلك .

هندي مثال صغير , لو انت في مصر –زيي كدا- وعايز تفتح الفيسبوك او اي موقع تاني , فانت بتشغل الراوتر وتفتح الواي فاي او تركب كبل النت وتفتح الموقع , ايه اللي بيحصل بقى من اول ماتكتب الurl الخاص بالموقع لحد ميتفتح ؟ الجهاز بتاعك بيبعت بياناته للموقع والموقع بيرد عليه بشكل مباشر من غير اي وسيط او وكيل .

اما بقى لو انت معاك proxy فجهازك هيبعت بياناته لسيرفر الproxy والسيرفر هيستلم البيانات اللي وصلتله من الip  المصري بتاعك ويبعتها للموقع بس بip  مختلف عنك وهيستلم الرد بتاع الموقع ويبعتهولك تاني عالip  المصري بتاعك , وبكدا يبقى انت ظاهر عند الموقع بip مختلف عن الip  الحقيقي بتاعك. بس طبعا الكلام دا كله بيبتم في وقت قليل جدا جدا !

طيب ايه بقى استخداماته ؟ ايه لازمته ؟

الproxy له استخدامات كتير جدا منها مثلا :لوعايز تشوف فيديو عاليوتيوب والفيديو دا محظور من البلد اللي انت فيها باستخدام الproxy هتقدر تشوف الفيديو دا وكذلك لو موقع محظور من بلدك تقدر تفتحه وتتصفحة باستخدام الproxy .

بس نخلي بالنا من حاجة مهمة جدا , وهي ان proxy  بنستخدمه في المهام السهلة او البسيطة فقط لأن سيرفرات الproxy هي بس بتخفي الip  بتاعك وبتديك ip مختلف يعني عبارة عن تبديل للip فقط انما مش بتديك خصوصية او حماية اكثر من الموجودة عندك , وبكدا مزود الخدمة بتاعتك (زي tedata كدا) يقدر يعرف انت فاتح ايه وبتعمل ايه وكل حاجة ! يعني لو انت بتستخدم الproxy عشان تتخفى او عشان يبقى عندك خصوصية اكثر يبقى انت كدا مش بتعمل اي حاجة .

طيب عرفنا ايه استخداماته .. ايه انواعه بقى ؟

الproxy  منقسم لنوعين فقط وهما ال HTTP proxy  وال Socks Proxy .

اول واحد وهو الHTTP proxy  دا اقدم نوع proxy وهو معمول مخصوص عشان يتم استخدامه في الويب فقط , يعني انت بتتصل بسيرفر الproxy عن طريق المتصفح بتاعك بس سواء كانت اضافة انت محملها او معدل في الضبط الخاص بالمتصفح .

اما بقى النوع التاني وهو Socks proxy دا بقى مفيد اكتر من الHttp proxy لأنه ببساطة بيمر منه اي نوع من traffic سواء كان ويب سيرفر او ftp server  يعني اتصالك بالكامل بيبقى مربوط بالبروكسي سيرفر مش مجرد انترنت فقط . . بس المشكلة هنا ان النوع دا من الproxy بيبقى ابطء من الhttp proxy .

بس في الاخر النوعين هما هما مش بيقدموا اي حماية او خصوصية زي ما قولت.

بس كدا دا كان شرح مبسط عن معنى الكلمة,وفكرة العمل , والأستخدامات , وانواع ال proxy ,

 لو عجبك متنساش تشترك في القناة وتقول رأيك في الكومنتس والسلام عليكم ورحمة الله وبركاته.

المصادر :

https://goo.gl/LSPiZ1

https://goo.gl/bxjXyp

https://goo.gl/tGXXhe

https://goo.gl/pkQvTy